جديد الموقع

  • المُشكلةُ والحَل لِترميم مُستقبل العراق ... المزيد
  • ما بعد تكريت وأخواتها ... المزيد
  • ما لا تريده إسرائيل من عاصفة الحزم!! ... المزيد
  • من كل 100 ألف عراقي واحد فقط ... المزيد
  • لأمريكا الجو وللقوات النظامية الأرض ومسؤوليتنا ممتلكات تكريت ... المزيد
  • العبادي يحدث ندماءه أنه فَشِل وقد يستقيل ... المزيد
  • السيفُ والهِلالانِ في تحالف سعودي تركي باكستاني ... المزيد
  • بغداد ستأخذ لقب أسوأ مدينة في العالم للمرة الرابعة ... المزيد
  • للموظف العراقي .. احذر ... المزيد
  • لماذا عاصفة الحزم نادرة ومهمة ... المزيد
  • عاصفة الحزم تكشف حلف إيران ... المزيد
  • عاصفة الحزم ... المزيد
  • الإخوان، شيخوخة السياسة ورشاقة الدعوة ... المزيد
  • موت إقليم البصرة ... المزيد
  • أكبر سرقة في تاريخ العراق ... المزيد

العراق مثل رجال عنده 3 أولاد وبنية 'لهجة بغدادية'

الكاتب: عامر الكبيسى

2015-06-05
حجم الخط

الأب الي هو العراق، فد يوم اتمرض خطية!! وراح يتعالج بأمريكا.
كتب الأب دستور وقال لولده :
ولدي آني بنيت إلكم فد بيت كُلش حلو، بيت بي 3 غرف كبيرة مؤثثة أحسن تأثيث، وبنيت وياه ملحق، كل واحد إله غرفة، ولأختكم الملحق، وأختكم تبقه بحمايتكم،
ولدي .. راح أبني بالبيت نفسه صالة "غرفة ضيوف " كبيرة وحلوة بيها تعب السنين، مفتاحها راح أخلي بيد الأخ الكبير، لكن بشرط ياخذ إله 3 أيام بالأسبوع يجيب ضيوفه

 

ولأخو الوسطاني يومين بالأسبوع، والأصغر يومين بالأسبوع، وكل أسبوع يا ولدي هم انطوا لأختك فد يوم لضيوفها وضيوف زوجها هدية من أي واحد بيكم..
الأخ الكبير من أخذ مفتاح "غرفة الضيوف" احتكر الغرفة بسرعة، وبدأت المؤامرات "وطيحان الحظ" ، الآن لازم الاثنين البقية الي همه حيل زعلانيين لازم "يدمرون غرفة الضيوف أو يخلوها غير صالحة للعمل" لأن الأخ الكبير لازمها وحده، وميخليهم يجيبون ضيوفهم، أو يستفيدون منها لأي شيء!! .

 


الأخ الصغير انقهر جدا، وقال : آني معليه بعد شتسوون سوو "طبكم مرض" !! وراح على غرفته ورتبها واهتم بيها حيل واهتم بولده الصغار، وتجي فلوسه مثل الورد، وبدأ إيعمر الغرفة، ويجيب حرس خاص للغرفة، وفتح للغرفة الي صارت أجمل شي بكل البيت باب خلفي على الخارج، وبدأ ياخذ مساحات إضافية من البيت الكبير، فأخذ "المنور وحمام وحديقة" إضافية، وبير ماء محد كان يدري بي.

 


الأخ الوسطاني خشمة يابس حيل، ومن ذوله العراكة، وعنده معارف كثير ما شاء الله عليه، والجوارين نصهم يحبوا، بس يخافون منه، ترك غرفته لأن عنده يأخذ بثاره أهم من أملاكه، ، وخله عينه على غرفة الضيوف الي اعتبرها مسروق جزء مهم منها وهو من حقه، "لو ألعب لو أكسر الملعب"
غرفة الأخ الوسطاني انهملت جدا، فجوي حراس ما يعرفهم وأخذوا معظم الغرفة

 

"كلهم حراس تقريبا" وهذوله الحراس الي جوي على غرفة الوسطاني كل يوم يقولون إحنا نستعد للانقضاض على الصالة الكبيرة وعلى الجيران وراح "ندمر الأخ الجبير" ، أما هو "الأخ الوسطاني" فبقه "يريد ياخذ اليومين مالته بالصالة" وحراس الأخ الكبير يمنعوا ..وبدو يعتبروا "إرهابي" فلزم " شاربه " وقال: لو أموت ما أترك أخويه الجبير وحده بالصالة، لازم آخذ حقي أو أموت.

 


جاءت رسالة جديدة من الأب "المريض في أمريكا" تقول لهم :
ولدي عيب عليكم فضحتونا قدام ولد عمنا الأمريكان "من نعلت والديهم" بس شنسوي همه الي مطببيني،
ولدي تره انتو قسمتوا البيت بلا ما تدرون، وراح ينباع للجيران برخص التراب، وهذا ضد وصيتي إلكم،
انت يا الجبير!! اشبيك اتخبلت!! إي مو انت كنت فقير ومظلوم، لما "طلع لك ريش" بديت إنت تظلم اخوتك !! هاي أشبيك ابني !! إي مو باجر راح تاكلها غسل ولبس يا وليد

 

صير عاقل ورجع الأربع أيام لاخوتك، لأن حراس الغرفتين، تره نسقو أمورهم وي إدارة المستشفى إلي آني بيها، وآني ما أريد أنطي بأحد بيكم والله يا وليدي، ولك ليش انت من اثنعش سنة عفتك، ليش قدرت اتجيب أحد يرضه على شكل الصالة!! إي مو خربتها، وما عرفت مثل أخوك الصغير اتعمرها، بس سويت مشكلة وانت كلشي ما استفاديت.
إنت يالوسطاني، شجاك، مو انت العاقل، مو أنت أبو العلم والمعرفة والبناء، مو انت أصلا بنيت البيت وي أبوك، أكو واحد يهدم شغله هو بناها!! وليدي، اهتم بغرفتك لأن ذوله الحراس تره ما يعرفون "صاحب صديق" وروح على ولدك إلي همه أحفادي

 

اجمعهم وليدي، حتى الي أخوك الجبير ايكول علي مو زين وارهابيين، خل أيولي معليك بي، هو دايخ هسه،، روح على ولدك برسعة أبني واجمعهم، وصيروا إيد وحده، حتى انقول "بيت الوسطاني واحد" حتى من اتروحون على اخوك الجبير اتروحون إيد وحده، هو هم يرتدع، ويعرف أن الله حق، ويبده يصير عادل، ويرجع اليومين مال الصالة إلك، ويفهم الدنيا مو "لعبة طوبة" ابني روح جمع ولدك بسرعة، أركض حبيبي ما كو وقت، لا تستثني أي واحد، صغير وكبير.

 


أما أنت يالصغير، ما كنت أتقع إنك تطلع سبع، مع انك الصغير، بس والله انت بار جدا بأبناء أخوك الوسطاني، الي ضيم حالهم ما جرالهم، زين سويت من بنيت غرفتك، لكن مو زين سويت من تركت الصالة ابني، روح ارجع للصاله وخلي أخوك الكبير يعقل، وخاف ما تدري يا وليدي، تره كتبتلك بأول رسالة إن " الصلاحيات التنفيذية " إلك نصها بالضبط !! شنو انت مو قاري الدستور وعارف "رئيس الجمهورية شنو صلاحياته" !! إذا عربيتك اشوية مو زينه روح على عمك نصير رئيس اليدوان، تعرفه مو،روح علي خلي يقرالك "نص الصلاحيات التنفيذية منو أول واحد مذكور" ابني اشتغل مثل شغلك وبارك الله بيك، بس ارجع ونظف الصالة،وعلم اخوتك من علمك، لأن أخوك الجبير مثل واحد "سكران"، والوسطاني مثل واحد مسجون.

 


بعدين أرسل الأب رسالة عامة للجميع: اختكم ليش عفتوها يا متخافون الله ، صحيح هي راج تطلع لبيت زوجها وانخطبت، بس هذا ما يعني تهملوها، ولدي آني راجع فد يوم من المستشفى ما أموت أبد ، هاي آني عمري عشرة آلاف سنة ما أموت، بس انتو دتموتون نفسكم بيدكم، راجع الكم مرة ثانية، بس ما أحب أشوف نفس التصرفات، من تعقلون آني أرجع.
الأبن الكبير الشيعة، الأبن الوسطاني السنة، الابن الصغير الكرد، والبنية المسيح

التعليقات

تعبر عن رأي كاتب التعليق

إضافة تعليق

رأيك يهمنا

CAPTCHA Image

مواضيع متعلقة